Zgjedhjet qendrore të 23 qershorit 2013 janë dhe eventi politik më i rëndësishëm për të ardhmen e vendit. Me qëllim që të kemi zgjedhje të lira, të pakontestuara dhe të drejta të gjithë aktorët e brendshëm e të jashtëm janë të predispozuar të ndihmojnë procesin zgjedhor.
Një nga aktorët më të rëndësishëm është Ambasada e Shteteve të Bashkuara në Shqipëri e cila ka akorduar në emër të qeverisë amerikane një sërë fondesh për mbështetjen e këtyre zgjedhjeve. Një nga përfituesit e granteve të vogla është edhe Instituti Shqiptar për Çështjet Publike i cili mendësoi projektin “Vota Rinore” me qëllim kryesor sensibilizimin e të rinjve për të marrë pjesë sa më gjerësisht në procesin zgjedhor. Votuesit për herë të parë janë në fokus të projektit “Vota Rinore” ku me anë të një autobusi, grupi i vullnetarëve i udhëhequr nga pedagogë, pasi të jetë trajnuar do të udhëtojë qytet më qytet e shkollë me shkollë në mënyrë që t’i gjendet sa më pranë të rinjve votues me argumente bindës për të drejtën ligjore dhe detyrimin moral të pjesëmarrjes në votime.
|
